پاک ، بھارت پانی کے مذاکرات 14، 15ستمبر کو واشنگٹن میں منعقد ہوئے ہیں

پانی کے تنازعے پر پاک بھارت مذاکرات 14اور 15ستمبر کو واشنگٹن میں ہوں گے ، عالمی بینک کی زیر نگرانی ہونے والے ان مذاکرات میں متنازع بھارتی پن بجلی منصوبوں پر بات کی جائے گی۔

بھارت پاکستان کے حصے کے پانی پر بھی قبضہ چاہتا ہے اور وہ بھی ان دریاؤں کا پانی روک کر جو سندھ طاس معاہدے کے تحت پاکستان کو ملے۔

بھارت دریائے نیلم پر 330میگاواٹ کا کشن گنگا اور دریائے چناب پر 850میگاواٹ کا رتلے پن بجلی منصوبہ بنا رہا ہے۔

بھارت کی آبی جارحیت بڑھتی ہی جا رہی ہے ۔بات اب دریائے چناب پر پکل دل ، لوئرکلنائی اور می یار پن بجلی منصوبوں تک پہنچ چکی ہے۔پاکستان کو بھارت کے ان تمام پن بجلی منصوبوں پر اعتراضات ہیں ۔

عالمی بینک سندھ طاس معاہدے کے تحت پاک بھارت آبی تنازعات حل کرانے کی کوشش کر رہا ہے، اسی سلسلے میں14 اور 15 ستمبر کو واشنگٹن میں مذاکرات ہونے جا رہے ہیں۔

ذرائع آبی وسائل ڈویژن کے مطابق واشنگٹن میں ہونے والے دوروزہ مذاکرات میں پاکستانی وفد کی نمائندگی وفاقی سیکریٹری آبی وسائل عارف احمد خان کریں گے۔

پاکستانی وفد میں انڈس واٹر کمشنر مرزا آصف بیگ ، اٹارنی جنرل اوشتر اوصاف اور آبی وسائل ڈویژن کے جوائنٹ سیکریٹری سید مہر علی شاہ بھی شامل ہوں گے جبکہ عالمی بینک پاک بھارت مذاکرات کی نگرانی کرے گا ۔

اس سے پہلے پاکستان اور بھارت کے درمیان سیکریٹری سطح کے مذاکرات جولائی کے آخرہ ہفتے واشنگٹن میں ہی ہوئے تھے۔

مسافر بس خوفناک حادثے کا شکار ،27 ہلاکتیں متعدد زخمی

چکوال میں ایک تیز رفتار بس کھائی میں جا گری جس کے نتیجے میں اس میں سوار 27 مسافر جاں بحق جبکہ 55 زخمی ہوگئے۔

 رپورٹ کے مطابق حادثہ رات تقریباً 9 بجے پیش آیا جب ایک تیز رفتار بس ڈاک پٹھان گاؤں کے نزیدک پُل پر موڑ کاٹتے ہوئے حادثے کا شکار ہوئی۔

بد قستمت بس میں 82 افراد سوار تھے جو کوہاٹ سے رائیونڈ جارہی تھی۔

ڈسٹرکٹ پولیس افسر (ڈی پی او) چکوال اور ڈپٹی کمشنر عمر جہانگیر بھی جائے حادثہ پر پہنچے اور ریسکیور آپریشن کی نگرانی کی۔

ریسکیو اہلکار اور ایمبولینسز جائے حادثہ پر پہنچیں اور لاشوں اور زخمیوں کو فوری طور پر تحصیل ہیڈ کوارٹر ہسپتال تلہ گنگ، ڈسٹرکٹ ہیڈ کوارٹر ہسپتال چکوال اور سٹی ہسپتال تلہ گنگ منتقل کیا گیا۔

ریسکیو 1122 کے ترجمان خرم منظور کا کہنا تھا کہ 13 زخمیوں کی حالت انتہائی تشویش ناک تھی جن کو فوری طور پر راولپنڈی کے ہسپتال میں منتقل کیا گیا۔

چکوال کے صدر پولیس تھانے کے اسٹیشن ہاؤس افسر (ایس ایچ او) محمد افضل نے ڈان کو بتایا کہ بس میں سوار مسافر کوہاٹ سے تبلیغی جماعت کے سالانہ اجتماع میں شرکت کے لیے رائیونڈ جارہے تھے۔

پولیس نے ابتداء میں 27 افراد کے ہلاک ہونے کی تصدیق کی تھی تاہم مزید تین مسافر زخموں کی تاب نہ لاتے ہوئے ہسپتال میں جان کی بازی ہار گئے، جبکہ مرنے والے تمام افراد کا تعلق کوہاٹ سے ہے۔

 

اتحاد کا فیصلہ اچھا ہے

کراچی کی سیاست میں بڑی تبدیلی کا امکان ظاہر کیا جا رہا ہے جہاں شہر کی دو بڑی سیاسی جماعتوں متحدہ قومی موومنٹ (ایم کیو ایم) پاکستان اور پاک سرزمین پارٹی ( پی ایس پی) کی جانب سے شہر کے مسائل حل کے لیے اتحاد بنانے کی اطلاعات ہیں۔

8 نومبر شام 6 بجے کراچی پریس کلب میں ایم کیو ایم پاکستان کے رہنما فاروق ستار اور پی ایس پی کے رہنما مصطفیٰ کمال مشترکہ پریس کانفرنس کریں گے۔

واضح رہے کہ ایم کیو ایم پاکستان نے اپنے تمام سینیٹر، قومی وصوبائی اسمبلی کے اراکین اور ممبرز و دیگر اہم عہدیداروں کا اجلاس بہادر آباد میں قائم دفتر میں طلب کررکھا ہے۔

اس حوالے سے ایم کیو ایم کے رہنما ڈاکٹر فاروق ستار نے بہادر آباد دفتر پہنچنے پر مختصر گفتگو کرتے ہوئے کہا کہ ہم ایک سیاسی وژن رکھتے ہیں اور ہم چاہتے ہیں کہ عوام کی زیادہ سے زیادہ بہتر انداز میں خدمت کی جاسکے۔

اس حوالے سے پی ایس پی کے رہنما رضا ہارون نے میڈیا سے گفتگو کے دوران کہا کہ دونوں جماعتیں مل کر کراچی کے عوام کے مسائل حل کریں گی۔

ان کا کہنا تھا کہ پاکستان، عوام کی خوشحالی، ترقی اور مسائل، جمہوریت اور اداروں کے استحکام پر سیاسی جماعتوں میں بات چیت ہونی چاہیے کیونکہ یہی سیاسی جماعتوں کی عملی سیاست کا محور ہے۔

بہادر آباد دفتر پہنچنے پر ایم کیو ایم پاکستان کے رہنما کامران ٹیسوری کا کہنا تھا کہ ہم محبت اور پیار پر یقین رکھتے ہیں اور کراچی کے عوام کی بھلائی چاہتے ہیں۔

اجلاس سے قبل ایم کیو ایم پاکستان کے رہنما فیصل سبزواری نے میڈیا سے بات چیت کرتے ہوئے کہا کہ تشدد کی سیاست ہماری پالیسی نہیں، کراچی کے شہری ایم کیو ایم کے ساتھ جڑے ہوئے ہیں اور متفقہ ایجنڈے پر عمل کرکے آگے بڑھیں گے۔

اس موقع پر سندھ اسمبلی میں اپوزیشن لیڈر خواجہ اظہار الحسن نے میڈیا سے بات چیت کرتے ہوئے کہا کہ شہر اور صوبے کے وسیع تر مفاد میں کوئی فیصلہ، جس میں اتحاد کا عنصر ہو، تو وہ فیصلہ خوش آئند ہے۔

ان کا کہنا تھا کہ بیان بازی سے کوئی کسی کو ختم نہیں کرسکتا، شہر کے مفاد میں اگر گرینڈ الائنس بنتا ہے تو وہ خوش آئند ہوگا۔

اس سے قبل ایم کیو ایم پاکستان کے رہنما رؤف صدیقی نے کراچی میں میڈیا سے گفتگو کرتے ہوئے کہا تھا کہ اس معاملے کو زیادہ بڑھا چڑھا کر نہیں پیش کیا جائے، پارٹی جو فیصلہ کرے گی اسے قبول کریں گے اور اس سے میڈیا کو آگاہ کردیا جائے گا۔

ان کا کہنا تھا کہ پاکستان کو اس وقت اتحاد کی ضرورت ہے، تمام سیاسی جماعتیں الفاظ کا چناؤ بہتر رکھیں۔

رؤف صدیقی کا کہنا تھا کہ ہر اچھا کام جس میں بہتری ہو اور اس میں فساد نہ ہو اس کو فروغ دینا چاہیے، اس وقت ملک کے حالات بدل رہے ہیں، سیاست کرنا سب کا حق ہے لیکن ایسی سیاست کی جائے جس میں نہ عوام پسے اور نہ ہی قومی مفاد کو نقصان پہنچے۔

ایک سوال کے جواب میں ان کا کہنا تھا کہ چاہے کتنی بڑی ہی سیاسی جماعت کیوں نہ ہو اگر وہ عوام کے دلوں سے نکل جائے تو وہ ختم ہوجاتی ہے۔

سابق گورنر سندھ ڈاکٹر عشرت العباد نے ڈان نیوز سے خصوصی گفتگو کرتے ہوئے کہا کہ ’ماضی میں کراچی مسائل کا شکار رہا ہے، ایم کیو ایم پاکستان اور پاک سرزمین پارٹی میں پہلے سے رابطے چل رہے تھے، جبکہ موجودہ صورتحال میں دونوں جماعتوں کا اتحاد کا فیصلہ اچھا ہے۔‘

انہوں نے کہا کہ ’دونوں جماعتوں کے درمیان تلخیاں بڑھ رہی تھیں لیکن اب اس فیصلے کے بعد ایم کیو ایم پاکستان اور پی ایس پی کو شہر اور صوبے کی ترقی کے لیے مل کر کام کرنا چاہیے۔‘

سیاست میں واپسی سے متعلق سوال پر ڈاکٹر عشرت العباد کا کہنا تھا کہ ’مستقبل میں سیاست میں حصہ لینے کا فیصلہ وقت کرے گا۔‘

سابق صدر جنرل ریٹائرڈ پرویز مشرف کے کراچی کی سیاست کے بدلتے ہوئے منظرنامے میں کردار کے حوالے سے ان کا کہنا تھا کہ ’پرویز مشرف کا موجودہ صورتحال سے براہ راست کوئی تعلق نہیں لگتا، یہ دونوں جماعتوں کا اپنا فیصلہ ہے جبکہ پرویز مشرف کی اپنی الگ جماعت ہے۔‘

پاکستان پیپلز پارٹی (پی پی پی) کے رہنما و صوبائی وزیر منظور وسان کے ایم کیو ایم پاکستان اور پی ایس پی کے حوالے سے حالیہ بیان سے متعلق سابق گورنر نے کہا کہ ’خواب کی تعبیر کے حوالے سے منظور وسان ہی بہتر بتا سکتے ہیں، لیکن انہوں نے کوئی بات کی ہے تو اس کا کچھ تو پس منظر ہوگا۔‘

خیال رہے کہ اس سے قبل 3 جون 2016 کو وطن واپسی پر سابق ناظم کراچی مصطفیٰ کمال نے پریس بریفنگ میں ایم کیو ایم سے علیحدگی اور نئی جماعت بنانے کا اعلان کرتے ہوئے ایم کیو ایم کو شدید تنقید کا نشانہ بنایا تھا۔

ایم کیو ایم پر تنقید کرتے ہوئے ان کا کہنا تھا کہ وہ پارٹی کا سسٹم جانتے تھے، انہیں معلوم تھا کہ پارٹی چھوڑ دی تو جان کو خطرہ ہوگا۔

اس کے بعد مصطفیٰ کمال متعدد مرتبہ ایم کیو ایم پر پابندی کا مطالبہ بھی کرچکے ہیں، ان کا کہنا تھا کہ ملک دشمن ایجنسیوں سے رابطہ رکھنے والی جماعت کو پاکستان میں سرگرمیوں کی اجازت نہیں ہونی چاہیے۔

واضح رہے کہ ایم کیو ایم پاکستان کے متعدد رہنما انیس قائم خانی، رضا ہارون، انیس ایڈووکیٹ پاک سرزمین پارٹی میں بھی شامل ہوئے تھے جبکہ حال ہی میں کراچی کے ڈپٹی میئر ارشد وہرہ بھی ایم کیو ایم پاکستان چھوڑ کر پی ایس پی میں شامل ہوئے تھے، جس کے بعد انہوں نے ایم کیو ایم پاکستان اور اس کی قیادت کو شدید تنقید کا نشانہ بنایا تھا۔

یاد رہے کہ رواں سال فروری میں ایم کیو ایم پاکستان کے سربراہ فاروق ستار اور پاک سرزمین پارٹی کے سربراہ مصطفیٰ کے درمیان ایک سیمینار میں ملاقات ہوئی تھی۔

---

گزارش: اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ خبر پسند آئی ہے تو اسے اپنی فیس بک وال پر شیئر کریں۔